යාපනයේ අපූරු සංහිඳියාව

0
358

රජය සංහිඳියාව ගැන හඬ නගයි. එහෙත් යාපනයේ නාගවිහාරාධිපති නාහිමියන්ගේ ආදාහන පූජෝත්සවය නගර සභාපිටියේ පැවැත්වීමට එරෙහිව අධිකරණය වෙතින් තහනමක්‌ ලබා ගැනීමට උත්සාහ කළේ හින්දු සංස්‌කෘතික කවුන්සිලයයි.

එසේම එලිලන් නම් වූ කොටි මිනීමරුවාගේ බිරිය වූ ආනන්දි සසිතරන් එම්. කේ. සිවාජිලිංගම් උතුරු පළාත් සභාපති සිවඥානම් සහ ද්‍රවිඩ සංධාන මන්ත්‍රී ශ්‍රීධරන්ද උන්වහන්සේගේ ආදාහන පූජෝත්සවයට එරෙහි වී ඇත. මේ හැර වත්මන් රජයට සංහිඳියාව ගැන උපදෙස්‌ දුන් ජනාධිපති නීතිඥ ශාන්තා අබිමානසිංහම්ද ඊට එරෙහි වී අධිකරණයට පෙත්සම ගොනු කළ වුන්ට සහය වී ඇත.

ද්‍රවිඩ ජාතික ජනතා පෙරමුණේ දේශපාලනඥයකු වු මනිවන්නන් මේ පෙත්සම අධිකරණය වෙත යොමු කළ නීතිවේදියා වේ. එසේ වූවත් අධිකරණය පෙත්සම ප්‍රතික්‍ෂේප කර තිබේ.

එහෙත් රජය සංහිඳියාව ගැන හඬ නගයි. උතුරේ සංහිඳියාවක්‌ ක්‍රියාත්මක නොවන අතර ද්‍රවිඩ සංධානය සහ උතුරු පළාත් සභාව සංහිඳියාවට මුවා වී බලය ලබා ගැනීමට උත්සාහ කරන බව පැහැදිලිය.

එසේ වූවත් රජය යථාර්ථය අවබෝධ කරගෙන නැත. එය වන්නි මෙහෙයුමට ඊශ්‍රායලය සහය දක්‌වා තිබියදී පලස්‌තීනය ඊට සහය වූ බව පැවසීමට සමානය.

යාපනයේ නාගවිහාරාධිපති හිමියන්ගේ ආදාහන පූජෝත්සවය ව්‍යර්ථ කිරීම සඳහා අන්තවාදීන් දැරූ උත්සාහය සඳහා අපූරු තර්කයන්ද අධිකරණයට යොමු කර තිබුණි.

ඒ ආදාහන පූජෝත්සවය නිසා ප්‍රදේශයේ සෞඛ්‍ය තත්ත්වයට හානියක්‌ සිදුවන බව දැක්‌වීමය.

ප්‍රභාකරන් යාපනයේ බෝම්බ පිපිරීම් සිදුකරද්දී සෞඛ්‍ය තත්ත්වයට හානියක්‌ නොවුණේද?

එදා ප්‍රභාකරන්ට එරෙහිව කිසිවෙක්‌ වචනයක්‌වත් පැවසුවේ නැත. එසේම යාපනයේ සිදුවීම් ගැන නිවේදන නිකුත් කරන විකල්ප ප්‍රතිපත්ති කේන්ද්‍රයේ රාජ්‍ය නොවන සංවිධාන ක්‍රියාකාරිනියක වූ මරියාද සිල්වා නමැත්තියත් නාගවිහාරාධිපති නාහිමියන්ගේ ආදාහන පූජෝත්සවය නතර කිරීමට අන්තවාදීන් දැරූ උත්සාහය ගැන කියන්නේ කුමක්‌ද?

මේ පසුබිම මැද යාපනයේ නාගවිහාරාධිපති නාහිමියන්ගේ ආදාහන පූජෝත්සවයට එරෙහිව සිදු වූ එදිරිවාදීකම් මෙරට බහුතරයෙන් වසන් වී ඇත.

එම එදිරිවාදිකම් ද්‍රවිඩ සංධාන නායක සම්බන්ධන් හා උතුරු මහ ඇමැති සී. විග්නේශ්වරන් පවා හෙළා දුටුවේ නැත. අඩු වශයෙන් ශෝක ප්‍රකාශයක්‌වත් ප්‍රකාශයට පත් වූයේ නැත.

එසේම කොටි හිතවාදී වෙබ් අඩවි අපවත් වී වදාළ නාහිමියන්ව හඳුන්වනු ලැබුවේ අන්තවාදී භික්‌ෂුවක්‌ ලෙසිනි. මෙහිදී ආනන්දි සසිතරන් නමැති කොටි කාන්තාව පැවසුවේ නාගවිහාරාධිපති නාහිමියන්ගේ ආදාහන පූජෝත්සවය පැවැත්වීම තුළින් හමුදාව සිංහල බෞද්ධාගම ද්‍රවිඩ ජනතාව මත යොමු කිරීමට ක්‍රියා කරන බවයි. ඇගේ මේ අවමන් සහගත ප්‍රකාශය කිසිදු දේශපාලනඥයෙක්‌ හෙළා දුටුවේ නැත. මේ හැර මෙරට භික්‌ෂු පරපුරට පවා යාපනයේ සිදු වූ මේ එදිරිවාදීකම් වසන් විය.

කොටි හිතවාදී වෙබ් අඩවි එම ආදාහන පූජෝත්සවය ගැන තවදුරටත් පැවසූවේ ද්‍රවිඩ දේශපාලනඥයන් සහ ප්‍රධාන පෙළේ නීතිවේදීන් ඊට එරෙහිවී තිබියදී හමුදාව මැදිහත් වී ආදාහන පුජෝත්සවය පැවැත් වූ බවයි.

එහෙත් උතුරේ පළාත් සභාව පවත්වාගෙන යැමට රුපියල් මිලියන ගණනක්‌ ලබාදී ඇත්තේ උතුරේ ද්‍රවිඩයන් නොව මෙරට බහුතරයේ බදු මුදල්ය. උතුරු මහ ඇමැති විග්නේශ්වරන්ද ඒ බව අමතක කර ඇත.

මේ පසුබිම මැද උතුරේ කොටි හිතවාදීන් උන්වහන්සේගේ ආදාහන පූජෝත්සවය පැවැත්වීම ගැන දොස්‌ නගා ඇත්තේ ආරක්‍ෂක හමුදාවට සහ හමුදාපති මහේෂ් සේනානායක මහතාටය.

එහෙත් යාපනයේ නාගවිහාරාධිපති නාහිමියන්ගේ ආදාහන පූජෝත්සවයට එල්ල වූ එදිරිවාදීකම් මෙරට බහුතරයෙන් වසන් විය.

එසේ වූවත් යාපනයේදී පොලිස්‌ භටයකුගේ වෙඩි පහරින් ද්‍රවිඩයකු මියගියේ නම් කොළඹ රාජ්‍ය නොවන සංවිධාන නටන නැටුම් බලාගත හැකිය. රජය පවා මේ සිද්ධිය ගැන නිහඬ විය. ද්‍රවිඩ සංධාන නායකත්වය පවා එම එදිරිවාදීකම් හෙළා දුටුවේ නැත.

කීර්ති වර්ණකුලසූරිය

LEAVE A REPLY

Please enter your comment!
Please enter your name here